Sunday, March 15, 2009
इन्डियन आइडल सौरभी कपिलका साथ काठमाडौंमा
भारतीय टेलिभिजन च्यानल सोनीले आयोजना गर्दै आइरहेको इन्डियन आइडलको पछिल्लो विजेता सौरभी देवबर्मा र उपविजेता कपिल थापा शुक्रबार काठमाडौं आइपुगेका छन्। उनीहरुको साथमा तेश्रो स्थान हात पार्न सफल तोर्सा सरकार पनि रहेकी छिन्। उनीहरुले काठमाडौं र पोखरामा विभिन्न सांगितिक कार्यक्रममा भाग लिने छन्। इन्डियन आइडल बनेपछिको पहिलो प्रस्तुति नै नेपालमा गर्न पाएकोमा कपिलले शुक्रबार प्रसन्नता 
व्यक्त गरे। होटल सोल्टीमा भएको संचारकर्मीसँगको भेटमा नेपाली मुलका देहरादुनी नव-गायक कपिलले क्रान्ति आलेले गाएको ´सरकारी जागिरे´ बोलको नेपाली गीतको केही हरफ पनि सुनाए। सानैदेखि नेपाल आउने रहर भएको बताउने कपिलले आफ्नो र चौथो इन्डियन आइडल सौरभीको प्रेमका विषयमा सोधिएको प्रश्नको जवाफ दिने जिम्मा भने सौरभीलाई नै दिए। सौरभीले आफूहरुबीच गहिरो सम्बन्ध रहेको बताउँदै इन्डियन आइडलका सबैभन्दा हितैषी नै कपिल रहेको बताइन्। उनीहरुले शनिबार सदर चिडियाखाना प्रवेशद्वार अगाडिको मैदानमा गाउनेछन् भने केही दिनपछि पोखरामा।
रेखा भन्छिन्– टुँडीखेलमा फिल्म जलाइदिन्छु
तीन वर्षअघि बनेको फिल्म ´हिम्मत´ चलाउने पालो यो साता पनि नआएपछि फिल्मकी निर्मात्री नायिका रेखा थापा अब टुँडीखेलमा लगेर फिल्मको प्रिन्ट जलाउने विचारमा छिन्। ´हिजोसम्म हाम्रो फिल्म चल्ने पक्का थियो, आज अर्कै चल्यो। यो के नियम हो मलाई थाहा छैन, अब फिल्म चलाउन नपाइने जस्तो लाग्यो। यस्तै हो भने टुँडीखेलमा लगेर फिल्मको प्रिन्ट जलाइदिन्छु´ रेखाले दैनिकीडटकमलाई भनिन्। ´शुक्रबारदेखि फिल्म चल्ने पक्का भयो, यसो समाचार निकाल्दिनु पर्यो है,´ बिहीबार बेलुकीसम्म रेखाका निर्माता पति छवि ओझा पत्रकारहरूलाई भनिरहेका थिए। तर, शुक्रबार ´हिम्मत´ को सट्टा राजधानीका हलमा नारायण पुरीको फिल्म ´मृत्युञ्जय´ चल्यो। यही फिल्म राजधानीमा चलाउनका लागि रेखा– छवि हलवालालाई मुद्दा हाल्ने तयारीसमेत गरेका थिए। तर, ´गिरफ्तार´ पछि चलाउने भन्ने सहमति भएपछि मुद्दा हालेका थिएनन्। निर्माता संघ र चलचित्र संघको सिफारिसमा चलचित्र विकास वोर्डले फिल्म चलाउने वतावरण वनाईदिए पनि अन्तिम समयमा प्रदर्शकले धोका दिएको ओझाले वताए। ´नियम कानुनको पालना नगर्दा पनि राज्यले सजाएँ दिन सक्दैन भने के काम गर्नु,´ फिल्मका प्रस्तुतकर्ता छविले पनि फिल्म जलाउने बताए। ´कुनै संघसंस्थाले पनि न्याय दिलाउन सकेन। अब सबैलाई टुँडिखेलमा जम्मा पारेर प्रिन्टमा आगो लगाईदिन्छौं´ काठमाडौंको विश्वज्योतीलगायतका हलमा फिल्म चलाउने उद्देश्यले तीन वर्षदेखि ´क्यू´ मा बसे पनि आफूमाथि पटक पटक–धोका भएको उनले बताए। ´वोर्डका अध्यक्षले नै फिल्म चल्ने निश्चित भयो भन्दै नयाँ प्रिन्ट वनाउन लगाएका हुन्। तर, प्रदर्शकको मनोपोली सामु वोर्ड पराजित भयो,´ आफूमाथि अन्याय भएको दुःख पोख्दै छविले भने। निर्माता ओझाले वोर्डको आश्वासनमा फिल्म चलाउने तयारी गरेको वताए पनि वोर्डका सदस्य केपी पाठकले भने व्यवसायिक कार्यमा वोर्डले हस्तक्षेप गर्न नमिल्ने बताए। ´कुन फिल्म चलाउने भन्ने कुराको निर्णय वोर्डले गर्दैन। पहिला सेन्सर भएकालाई मौका दिनुपर्छ भनिएको हो, प्रदर्शकले नदिन पनि सक्छ´ वोर्डले लागु गरेको नयाँ नियमको विषयमा उनले भने। कसैलाई अन्याय भएको गुनासो आए मिलाउन प्रयत्न गर्ने उनले वताए। ´हिम्मतको सम्बन्धमा कुनै लिखित निवेदन नआएकोले केही भन्न मिल्दैन,´ पाठकले भने।
Subscribe to:
Comments (Atom)